عاشق کو آزمانا
عاشق کو آزمانا اگر حق ترا کہوں
ہر اک جفا کو تیری سراپا وفا کہوں
کیا کچھ کہوں نہ مدحتِ خنجر نظر میں پر
کاٹے زباں تو پھر دمِ اظہار کیا کہوں
ہے کشمکش جوابِ سیہ نامہ میں مجھے
گیسو ، نقاب یا نگہِ سرمہ سا کہوں
اس مشتِ خاک کی ذرا قیمت نہیں ولے
بوسہ قدم کا ہو تو تری خاکِ پا کہوں
روداد مجھ سے سن گئے تنہائی میں بہت
ہو تاب کچھ تو سامنے دل کی صدا کہوں
ایماں لٹا دیا ہے تو پھر کچھ بُرا نہیں
آڑِ صنم کو بیتِ خدا کی رِدا کہوں
یہ چارہ ساز کہتے ہیں مجھ کو شِفا ملے
اس کو دعا کہوں میں یا پھر بددعا کہوں
آنکھوں سے دریا خونِ تمنا کا بہ گیا
ساغر میں بند کر کے تجھے مدعا کہوں
جب تن کا انگ انگ ہے بیزارِ زندگی
اپنے وجود کو ہَمَہ ذوقِ قضا کہوں
زلفوں کو تیری کہنا شبِ قدر ہی سہی
چہرے کو تیرے مظہرِ نورِ خدا کہوں
ہے اس میں پیچ و تاب *سکندر* لگے بہت
خود بھی میں اپنے عقدۂ دل کو نہ وا کہوں
